Isroil bosh vaziri Binyamin Netanyaxu 16-oktyabr kuni G‘azodagi barcha garovga olinganlarning jasadlari qaytarilishini aytdi va “urush hali tugamaganini” ta’kidladi, deb xabar berdi France24.

“Bizning maqsad — barcha garovga olinganlarning jasadlarini qaytarish. Kim bizga qarshi chiqsa, katta to‘lov to‘laydi”, dedi u harbiylar qabristonidagi marosimda.

Netanyaxu Isroil urushdan “barcha maqsadlariga erishishini” bildirdi. Shu bilan birga, Isroil garovga olinganlar forumi XAMAS jasadlarni qaytarmaguncha sulh bosqichlarini kechiktirishga chaqirmoqda. Hozirgacha 20 nafar tirik garovdagilar va yetti kishining jasadi qaytarilgan.

Sulh kelishuviga ko‘ra, Isroil har bir o‘z fuqarosi uchun 15 nafar falastinlik jasadini topshiradi — shu tariqa G‘azoga qaytarilganlar soni 90 nafarga yetdi.

2023-yil oktyabridan buyon G‘azoda taxminan 68 ming nafar falastinlik halok bo‘lgan, yana minglab odamlar bedarak yo‘qolgan.

• Binyamin Netanyaxu
• Isroil
• Urush