Markaziy bank va Moliya vazirligi tomonidan tashkil etilgan Pul-kredit siyosatining 2020–2022-yillar uchun mo‘ljallangan asosiy yo‘nalishlariga bag‘ishlangan matbuot anjumanida 2021-yil boshidan boshlab kreditlarni imtiyozli foiz stavkalarida berish bekor qilinishi haqida ma’lumot berildi.

2020-yilda beriladigan kreditlar qayta moliyalashtirish stavkasiga ko‘ra belgilanadi

2020-yil 1-yanvardan boshlab tijorat banklari tomonidan milliy valyutada yangidan beriladigan barcha turdagi kreditlar, shu jumladan, davlat dasturlari doirasida ajratiladigan kreditlar bo‘yicha foiz stavkalari Markaziy bankning qayta moliyalashtirish stavkasidan kam bo‘lmagan darajada belgilanadi (hozirda bu stavka 16 foizni tashkil etadi).

Qishloq xo‘jaligi mahsulotlari ishlab chiqaradigan korxonalar istisno qilindi

Bu tartib faqat ipotekani kreditlash bo‘yicha davlat dasturlari hamda paxta xomashyosi va boshoqli don ekinlarini yetishtirish uchun qishloq xo‘jaligi mahsulotlari ishlab chiqaruvchi korxonalarga ajratiladigan kreditlar uchun istisno qilindi.

2021-yildan imtiyozli kreditlar ajratilmaydi

2021-yil boshidan boshlab kreditlarni imtiyozli foiz stavkalarida berish bekor qilinadi. Banklar zarur hollarda, foiz xarajatlarining ma’lum bir qismini kompensatsiya qilish mexanizmlarini joriy etish orqali foiz stavkalarini mustaqil belgilaydi.

Balans taqchilligi kamaytiriladi

Moliya vazirligi 2020-2021-yillarda tartibga solinadigan narxlar (tariflar)ni inflyatsiya maqsadlariga ta’sirini hisobga olgan holda erkinlashtirish grafigini ishlab chiqishi, umumiy fiskal balans taqchilligini 2022-yilda 1,5 foizdan oshmaydigan darajagacha bosqichma-bosqich kamaytirishni, shuningdek, Davlat budjetining belgilangan parametrlar doirasidagi qat’iy ijrosini, soliq-budjet va pul-kredit siyosati muvofiqligini ta’minlashi lozim bo‘ladi.

Norezidentlar ham moliya bozoriga kirishi mumkin

Norezidentlarga moliya bozoriga kirishga ruxsat beriladi. Bunda Kapital bozorini rivojlantirish agentligi, Moliya vazirligi va Markaziy bankga yuzaga kelishi mumkin bo‘lgan salbiy oqibatlarini bartaraf qilishning aniq mexanizmlari va instrumentlarini ishlab chiqishlari zarur.

Xabardor.uz