Apelsindan tayyorlanadigan fanta ichimligini ko‘pchilik sevib iste’mol qiladi. Biroq uning chiroyli, yorqin idishi ichida qancha kimyoviy modda borligi yolg‘iz ishlab chiqaruvchiga ayon. Shifokorlar katta yoshli odamlarga ham fanta ichishni tavsiya qilishmaydi. Yosh bolalarga-ku, foydasidan ko‘ra ziyoni ko‘p.
 
Biroq apelsin ta’mi ishqibozlariga fantaning alternativ variantini tavsiya etamiz – uyda tayyorlangan fanta. Mazkur ichimlik mazasi bo‘yicha do‘kondagi analogidan deyarli farq qilmaydi. Bundan tashqari, organizm uchun foydasi ham bir necha barobar yuqori.

Tarkibi:
Suv – 700 ml.
Apelsin – 2 ta.
Mandarin – 3 ta.
Limon – 1 ta.
Shakar – 150 g.
Gazlangan suv – 500 ml.

Tayyorlanishi: 
1. Mevalar suvda yaxshilab yuviladi. So‘ng limonning po‘sti o‘tkir pichoq yordamida sekin qirib olinadi. Bizga faqat sariq rangli po‘sti kerak. Limon po‘chog‘ining oq qismi ichimlikka tushmasligi kerak. Aks holda, u fantamizni achchiq qilib qo‘yadi. 

2. Limonning qolgan qismidan sharbatini siqib oling. Yoki urug‘ini olib tashlab, blenderda aylantirish ham mumkin. Xuddi shu tarzda apelsin va mandarinlarni ham tayyorlab olamiz. Ya’ni, dastlab syedrasini, keyin esa sharbatini chiqaramiz.

3. Kastryulkaga mevalar po‘stini solib, ustidan sharbatini quying va shakar seping.

4. Barcha masalliqlar ustidan qaynagan suv solib, 1 daqiqa miltillatib qaynating. So‘ng uni sovutib, idishi bilan 5 soatga muzlatgichga qo‘ying. Sovuganidan so‘ng ajoyib apelsin-limonli ichimlik hosil bo‘ladi.

5. Muzlatgichdan siropni olib, birga bir proporsiyada gazlangan suv aralashtiring. Endi bemalol ichsangiz bo‘ladi. Istasangiz, gazlangan suvni birdaniga qo‘shib yuboring. Yoki bo‘lmasa, har ichish oldidan gazli suv aralashtirish ham mumkin.