Toshkent davlat yuridik universitetiga o‘qishga kirishda topshiriladigan test sinovlari tarkibiga o‘zgartirish kiritiladi.

Unga ko‘ra, 2023/2024-o‘quv yilidan boshlab, mazkur universitetga kirishda test sinovlarining 2-bloki, ya’ni “yurisprudensiya” bakalavriat ta’lim yo‘nalishiga mos fanlar bo‘yicha Tarix fani o‘rniga huquqiy fanlar kiritiladi.

Ta’lim muassasasi rahbariyati mazkur o‘zgarishni “yurisprudensiya” ta’lim yo‘nalishiga mos fanlar bo‘limida nomutaxassislik (tarix) fanining belgilanishi umumiy o‘rta ta’lim va oliy yuridik ta’lim o‘rtasida uzviylikning ta’minlanmasligiga, maktabda huquqshunoslik faniga bo‘lgan qiziqishning pasayishiga hamda oqibatda oliy ta’limga kelgan talabada huquqiy fanlar bo‘yicha zarur bilim shakllanmasligiga sabab bo‘layotgani bilan izohladi.

Shuningdek, bu borada xorijiy tajriba ham o‘rganilgani, jumladan, Glazgo universiteti, Londondagi Kings kolledji, Nottingem va Oksford universitetlariga o‘qishga kirish uchun Huquqshunoslik uchun milliy kirish testi (National Admission Test for Law, LNAT) topshirish talab etilishi ma’lumot uchun keltirib o‘tiladi.

Universitet ma’muriyati ayni paytda maktablarda o‘qitilayotgan Davlat va huquq asoslari hamda Konstitusiyaviy huquq asoslari fanlari kelgusi o‘quv yilida kirish imtihonlari uchun tuziladigan test savollariga asos bo‘lishini bildirgan.

Eslatib o‘tamiz, shu paytgacha Toshkent davlat yuridik universitetiga o‘qishga kirishda abituriyentlar 2 ta bo‘limdan iborat 5 ta fan majmuasidan test sinovlari topshirib kelgan. Bunda, 1-bo‘limda barcha yo‘nalishlar uchun majburiy 3 ta fan – Ona tili (o‘zbek, rus yoki qoraqalpoq tili), Matematika va O‘zbekiston tarixi, 2-bo‘limda “yurisprudensiya” ta’lim yo‘nalishi bo‘yicha 2 ta fan – Tarix va Chet tili fanlari jamlangan.