Yangi O‘zbekiston universitetida o‘qish uchun kontrakt narxi e’lon qilindi. Narxlar universitet saytida ma’lum qilindi.

Unga ko‘ra, mahalliy talabalar uchun bir semestrga 24 mln. 850 ming so‘m,  xorijiy talabalar uchun esa bir semestrga 5 ming AQSh dollari etib belgilangan edi.
Universitetda o‘qish davomiyligi ikki semestrni tashkil etadi.

Ammo biroz vaqtdan so‘ng, universitet saytidan noma’lum sabablarga ko‘ra kontrakt narxlari to‘g‘risidagi ma’lumot olib tashlandi. 

Ma’lumot uchun, joriy yilda qabul boshlanadigan mazkur universitet imtihonlarini Kembrij universiteti o‘tkazadi. Bunda Massachusets texnologiya instituti hamda Myunxen texnika universiteti bilan birgalikda o‘quv reja va dasturlar ishlab chiqiladi. Shuningdek, ular ta’lim sifatini nazorat qilish, laboratoriya va kutubxonalarni to‘ldirishga ko‘maklashadi.

Ilk o‘quv yili shu yil sentyabrdan boshlanadi. Yangi bino qurilguncha darslar Jahon iqtisodiyoti va diplomatiya universitetining bo‘sh binolarida vaqtinchalik o‘tib turiladi.