Navoiy viloyati IIB axborot xizmati ma’lum qilishicha, Navoiy shahridagi xususiy bog‘chada bolalarga qo‘pol muomala qilib, ularni urgan tarbiyachiga nisbatan jinoyat ishi qo‘zg‘atildi.

Joriy yilning 8-aprel kuni ijtimoiy tarmoqlarda Navoiy shahridagi xususiy maktabgacha ta’lim muassasasi tarbiyachisi tarbiyalanuvchilarga qo‘pol munosabatda bo‘lib, ularni qiynab, do‘pposlaganlik holati aks etgan videoxabar tarqaldi. Ushbu videotasvirlardagi holat yuzasidan Navoiy viloyati IIB tomonidan tezkor-surishtiruv ishlari olib borilganda, mazkur holat joriy yilning 7-aprel kuni Navoiy shahar “Yangiariq” MFYda joylashgan fuqaro S.S. rahbarligi ostida bo‘lgan xususiy maktabgacha ta’lim muassasasida sodir etilganligi, mazkur ta’lim muassasasida tarbiyachi bo‘lib ishlab kelayotgan 2003-yilda tug‘ilgan fuqaro E.N. o‘zining qaramog‘i ostidagi guruhida tarbiyalanayotgan bolalarni go‘yoki, tartibga solish usuli sifatida ayovsiz kaltaklaganligi aniqlangan.

Shuningdek, o‘rganishlar davomida gumonlanuvchi tomonidan joriy yilning mart oyidan aprel oyiga qadar bo‘lgan vaqt oralig‘ida qaramog‘ida bo‘lgan bolalarni o‘zini-o‘zi himoya qilish imkoniyati cheklanganligi va ojiz ahvolda ekanligidan foydalanib, do‘pposlash va zo‘rlik ishlatib sodir etiladigan boshqa harakatlar bilan muttasil ravishda qiynab kelganligi ma’lum bo‘ldi.

Mazkur holat yuzasidan E.N.ga nisbatan Navoiy shahar IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 110-moddasi 2-qismi bilan jinoyat ishi qo‘zg‘atilgan va fuqaro gumonlanuvchi tariqasida protsessual tartibda ushlangan. Hozirda dastlabki tergov harakatlari olib borilmoqda.

“Tergov yakuniga ko‘ra aybdor shaxslarga nisbatan qonuniy qaror qabul qilinishi ta’minlanadi”, – deyiladi xabarda.

• Bolalar
• Bolalar bog‘chasi
• Kaltaklash
• Navoiy