Senat a’zolari “Investitsiyalar va investitsiya faoliyati to‘g‘risida”gi O‘zbekiston Respublikasi Qonunini ko‘rib chiqib, ma’qulladi. 

Bugun bo‘lib o‘tayotgan Oliy majlis qonunchilik palatasining yigirma beshinchi yalpi majlisida O‘zbekistondagi investitsiya faoliyati yigirma yil avval qabul qilingan va hozirgi zamon talablariga javob bermaydigan qonunlar bilan tartibga solinayotgani ta’kidlandi. 

Bundan tashqari, O‘zbekistonda investitsiya munosabatlarining katta qismi boshqa tarmoqlarga doir qonun hujjatlari bilan tartibga solinadi. Investitsiyaga oid qonun hujjatlari normalarining tarmoqlar bo‘yicha taqsimlab yuborilganligi uning huquqni qo‘llash amaliyotini murakkablashtirishi tilga olindi. Shuningdek, bu investitsiyaga oid qonun hujjatlarining samaradorligini pasaytirishi, mamlakat iqtisodiyotining rivojiga salbiy ta’sir ko‘rsatishi aytildi. 

 “Shu munosabat bilan “Investitsiyalar va investitsiya faoliyati to‘g‘risida”gi Qonun ishlab chiqilib, u O‘zbekiston Respublikasi qonun hujjatlari tizimiga yagona birlashtirilgan hujjat sifatida kiritiladi. Bunda Qonunda tayanch tushunchalar joriy etilib, unda mazkur sohada foydalaniladigan asosiy tushunchalar ochib berilmoqda”, deyiladi O‘zbekiston Respublikasi
 

Oliy Majlisi Senatining Axborot xizmati xabarida. 

Shuningdek, qonuniylik, oshkoralik va ochiqlik, investitsiya faoliyatini amalga oshirish erkinligi, adolatlilik va investitsiya faoliyati subyektlarining tengligi, investorlarga nisbatan kamsitishga yo‘l qo‘ymaslik, investorlarning vijdonliligi prezumpsiyasi – investitsiyalar va investitsiya faoliyatining asosiy prinsiplari ekanligi aytib o‘tildi. Investitsiyalarning aniq maqsadiga ko‘ra turlari belgilanib, u kapital, moliyaviy va ijtimoiy turlarga bo‘linadi. 

Belgilanishicha, pul mablag‘lari (shu jumladan chet el valyutasi) va boshqa moliyaviy mablag‘lar, shu jumladan, kreditlar, paylar, ulushlar, aksiyalar va boshqa qimmatli qog‘ozlar, ko‘char va ko‘chmas mol-mulk hamda boshqa obyektlar investitsiya resurslari jumlasiga kiradi.

Bundan tashqari, Qonunda investorning, investitsiya faoliyati ishtirokchisining huquqlari, majburiyatlari, investitsiya faoliyati subyektlarining huquqiy kafolatlari mustahkamlanmoqda. 

Qonun qabul qilinishi investitsiya makoni yaxlitligini, mamlakat va xorijiy investorlar huquqiy rejimi tengligini, O‘zbekiston Respublikasi hududida investitsiya faoliyati subyektlarining iqtisodiy faoliyati erkinligini ta’minlashi va O‘zbekiston investitsiya bozori samarali faoliyat ko‘rsatishi uchun shart-sharoitlar yaratishi ta’kidlandi.