Markaziy Osiyo keramika merosining durdonasi – bug‘u tasvirlangan anor shaklidagi ko‘za O‘zbekistonga keladi.

Islom sivilizatsiyasi markazida yaqin kunlarda namoyish etilishi kutilgan navbatdagi badiiy eksponat – XIII–XIV asrlarga oid, Elxoniylarga mansub noyob anor shaklidagi ko‘za muzey ixlosmandlarini kutmoqda.

Balandligi 25,2 sm, kengligi 18,1 sm bo‘lgan mazkur ko‘za nafaqat o‘zining shakli bilan, balki yuzasidagi bug‘u tasviri va gullik ornamentlari bilan ham e’tiborni tortadi. Unda Xitoy chinni san’ati ta’sirini ko‘rish mumkin bo‘lib, bu madaniy aloqalarning o‘sha davrda qanchalik keng qamrovli bo‘lganini anglatadi.

Ushbu eksponat XIV–XV asrlarda keng tarqalgan Temuriylar oq-ko‘k keramikasiga xos uslublarning ilk namunasi sifatida ham baholanmoqda. Shu bois, u Temuriylar davri san’atining shakllanish jarayonini o‘rganishda muhim manba hisoblanadi.

Qayd etish kerakki, Movarounnahrning XIII–XIV asrlarga oid bunday keramik buyumlari juda kam saqlangan. Hozirda Aron galereyasi(Angliya) to‘plamida saqlanayotgan ushbu noyob ko‘za tez orada Islom sivilizatsiyasi markazidagi “Ikkinchi Renessans” zalida keng jamoatchilikka taqdim etiladi.

• Buyuk Britaniya
• Eksport
• Madaniy meros
• muzey