Professional Futbol Ligasi taqvimiga koʻra Superliganing 4-tur oʻyinlariga 19-mart kuni start berilishi kerak edi. Ammo, O‘zbekistonda koronavirus qayd etilgan bemorlar soni oltitaga yetib, infeksiya tarqalishi xavfi paydo bo‘lgani tufayli Hukumat tomonidan 16-martdan boshlab oʻtkazilishi rejalashtirilgan barcha tadbirlar bekor qilindi. Bu haqda Jismoniy tarbiya va sport vazirligi Matbuot xizmati ma’lum qildi.
Shu sababli, barcha futbol musobaqalari ham qoldirildi. 15-mart kuni OʻFA birinchi vitse-prezidenti Ravshan Ermatov ham futbol boʻyicha oʻtkaziladigan har qanday uchrashuvlarning bekor qilinishi boʻyicha topshiriq berdi. Shu sababdan Superliga oʻyinlari ham nomaʼlum muddatga qoldirildi.

Bundan avval, Yevropaning ko‘plab milliy chempionatlari, xususan, Premyer Liga, La Liga, A Seriya, Liga 1 COVID-19 koronavirusi tufayli to‘xtatilgan edi.