Ҳисоб палатаси 2022 йил учун Давлат бюджети лойиҳаси бўйича ўз хулосасини берди.

Ҳисоб палатаси хулосасида Бюджетномадаги барча бюджет ташкилотларида (таълим ва соғлиқни сақлаш муассасаларидан ташқари) ишлайдиган ходимларни моддий рағбатлантириш махсус жамғармасини бир хил 10 фоиз миқдорида шакллантиришни назарда тутувчи бандига нисбатан эътироз билдирилган.

Мазкур ҳужжатда бу тартиб бюджет муассасаларида ишловчи ходимлар реал даромадларининг ҳар ойда ўртача 250 минг сўмдан 1,5 млн сўмгача камайишига олиб келиши айтилган.

Ҳисоб палатаси ўз хулосасини асослантириш учун, Бюджетномада кўрсатиб ўтилган айрим фактларни келтириб ўтади.

Унга кўра, 2022 йилда бюджет муассасаларида ишловчи ходимларнинг иш ҳақи индексацияси (7 фоиз) кутилаётган инфляция даражасидан (9 фоиз) паст миқдорда белгиланаётганлиги, жисмоний шахслардан олинадиган мол-мулк солиғи ставкалари 10 фоизга, электр энергияси 33 фоизга, табиий газ 21 фоизга, иссиқ сув ва иссиқлик энергияси 21 фоизга, совуқ сув ва канализация 33 фоизга оширилиши кутилмоқда.

“Шу боис, – дейилади Ҳисоб палатаси хулосасида – аҳолининг реал даромадини тушиб кетишини олдини олиш мақсадида, бюджет ташкилотларида ходимларни (таълим ва соғлиқни сақлаш муассасаларидан ташқари) моддий рағбатлантириш махсус жамғармасини “Бюджет муассасалари ва ташкилотлари ходимларини моддий рағбатлантириш махсус фонди тўғрисида”ги Низомда белгиланган 15 фоиздан 10 фоизгача камайтириш таклифини бекор қилиш мақсадга мувофиқ”.

• Бюджет
• Коммунал тўловлар