Кеча, 16 январь куни Чеченистон раҳбари Рамзан Қодировнинг ўғли Адам Қодировнинг кортежи Грозний шаҳрида йўл-транспорт ҳодисасига учрагани ҳақида хабар берилганди. Автоҳалокатдан сўнг Қодировнинг ўғли Россиянинг Москва шаҳридаги шифохонага олиб кетилди. Бу ҳақда Fortanga нашри хабар бермоқда.

Нашр 16 январь куни кечқурун Грознийдан учиб кетган Россия Фавқулодда вазиятлар вазирлигининг Аn-148-100ЕМ самолётига эътибор қаратган. Самолёт ҳақида маълумот “Flightradar24”да пайдо бўлган. Аn-148-100ЕМ беморларни ташиш учун ишлатилади. 

Маълум қилинишича, Грозний марказидаги содир бўлгани тахмин қилинаётган автоҳалокат жойида йўллар беркитилган ва Адам Қодиров дастлаб олиб кетилган республика шифохонаси яқинида катта тирбандлик юзага келган.

Шу билан бирга, 16 январь куни кечқурун Рамзан Қодировнинг шахсий Airbus самолёти Чеченистон пойтахтидан Москвага йўл олган. “Flightradar24” маълумотларига кўра, самолёт ярим тунда Грознийдан учиб кетган. 

• Avtohalokat
• Chechiniston
• Россия