Бухорода аҳолига кўрсатилаётган транспорт хизматлари сифатини яхшилаш мақсадида замонавий ҳаракат таркиблари (янги автобусларни) олиб келиш ишлари давом этмоқда. Хусусан, “Бух Пит Стоп” корхонаси томонидан яна 25 та замонавий автобус олиб келинди. Бу ҳақида вилоят ҳокимлиги матбуот хизмати хабар берди. Қайд этилишича, ушбу автобуслар ҳам йўловчилар учун қатор қулайликларга эга. Улар “Евро-5” стандарти талабларига тўлиқ жавоб беради ҳамда табиий сиқилган газда ҳаракатланади. Ҳар бири 30 нафар йўловчини қулай шароитларда манзилига етказишга мўлжалланган ушбу автобуслар паст полли бўлиб, ногиронлиги бўлган шахсларнинг ҳаракатланиши учун махсус пандус ускуналари ва алоҳида ўриндиқлар билан жиҳозланган. Йўл ҳақи тўловларини электрон тарзда ҳам амалга ошириш учун “АТТО” тизими ўрнатилган. Автобус салони тўлиқ кузатув камералари билан таъминланган. Шунингдек, автобус ичидаги йўловчиларни сонини аниқлаш тизими йўлга қўйилган.

Юқори даражадаги қулайликларга эга бўлган замонавий автобуслар жамоат транспорти етиб бормаган нуқталарни ўзаро боғлаш учун хизмат қилиб, тендер натижаларига кўра 13-сонли “Маданият” бош бекати – “Тўқимачи” бош бекати ва 15- сонли “Марказий деҳқон бозори” бош бекати – “Ғурбинча” йўналишларида брутто асосида қатновларни амалга ошириб, йўловчиларга транспорт хизмати кўрсатишни бошлайди.

Март ойи якунига қадар Бухорога яна 60 та ана шундай автобуслар олиб келиниши режалаштирилган. Хусусан, “Ютонг” компанияси билан ҳамкорлик доирасида шаҳар типига мослаштирилган катта ҳажмдаги 12 дона автобус харид қилиш бўйича шартнома имзоланган. Ҳозирда бу автобуслар ҳам етказиб бериш жараёнида. Умуман, йил якунигача янги олиб келинаётган жамоат транспортлари сони 100 тадан оширилади. Ушбу авобусларнинг барчаси йўналишларда брутто-шартнома асосида аҳолига хизмат кўрсатади.

• Автобус
• Бухоро
• Жамоат транспорти