Украинага қарши олиб борилаётган кенг кўламли урушда Россия армиясининг тасдиқланган йўқотишлари 160 минг кишидан ошди. Бу ҳақда Медиазона хабар берди.

Медиазона очиқ манбалари асосида босқин бошланганидан буён ҳалок бўлган 163 606 нафар россиялик ҳарбийнинг исмини аниқлаган. Бироқ бу рўйхат тўлиқ эмас, чунки ҳалок бўлган ҳарбийларнинг барчаси ҳақидаги маълумотлар оммага ошкор бўлавермайди. 

Халқаро ташкилотлар ва разведка тузилмаларининг Россиянинг умумий йўқотишлари (ўлдирилганлар ва яраланганлар) бўйича баҳолари анча юқори. 2025 йил декабрида NATO'даги юқори лавозимли мансабдор шахс Россия армиясидаги ўлдирилган ва яраланганлар сони 1,15 млн кишига яқинлашиши мумкинлигини айтган. Унинг сўзларига кўра, ноябрь ойида Россиянинг ўртача суткалик йўқотишлари тахминан 1100 кишини ташкил этган.

Шу йил 13 январь куни NATO Бош котиби Марк Рютте Россия Украинада ойига 20-25 минг нафар ҳарбийни йўқотаётганини, яъни ўлдирилаётганини маълум қилган. У бу кўрсаткич 10 йил давом этган Афғонистон урушида ҳалок бўлган қарийб 20 минг нафар совет аскарининг умумий сонидан ҳам ошиб кетишини қайд этган. Рюттенинг сўзларидан келиб чиқиб, фақат 2025 йилнинг ўзида Россиянинг ўлдирилган ҳарбийлари сони 300 минг кишигача етган бўлиши мумкин.

2025 йил июнь ойида Британия разведкаси Россиянинг умумий йўқотишларини тахминан бир миллион киши деб баҳолаган. Ўтган йил август ойида АҚШ Президенти Доналд Трамп 2025 йил бошидан буён Россия 112 мингдан ортиқ аскарини йўқотганини айтган. The Economist журнали декабрь ойидаги таҳлилида уруш давомида Россиянинг жами йўқотишлари 900 мингдан 1,35 млн кишигача етган дея баҳолаган.

• Россия
• Украина
• Уруш