31°
Кечаси 18°
Озарбайжон Ташқи ишлар вазирлиги мамлакатдаги Россия элчиси Михаил Евдокимовни чақиртириб, унга норозилик нотаси топширди. Бу ҳақда Озарбайжон ТИВ матбуот хизмати хабар берди.
Учрашувда Озарбайжон томони Россия Давлат думасининг МДҲ ишлари, Евросиё интеграцияси ва Россия билан алоқалар бўйича қўмитаси раисининг биринчи ўринбосари Константин Затулиннинг баёнотига кескин норозилик билдирган. Гап Затулиннинг Озарбайжонда Арманистон фуқаролари судлангани ҳақидаги фикрлари ҳақида бормоқда. Шу сабабли Россия элчисига тегишли норозилик нотаси топширилган.
Озарбайжон Ташқи ишлар вазирлиги Затулин фаолиятини кескин қоралашини маълум қилди. Вазирлик маълумотларига кўра, у узоқ вақтдан бери Озарбайжон Республикасининг суверенитети ва ҳудудий яхлитлигига қарши чиқмоқда, айирмачиликни қўллаб-қувватлашини очиқчасига намойиш этмоқда ва Арманистон фуқароларига нисбатан суд қарорларини бузиб кўрсатишга уринмоқда.
Баёнотда таъкидланишича, гап тинчлик ва инсониятга қарши жиноятлар, шунингдек, Арманистоннинг Озарбайжонга қарши ҳарбий тажовузи натижасида содир этилган жиноятлар учун айбдор деб топилган ва ҳукм қилинган шахслар ҳақида кетмоқда.
Учрашувда Озарбайжон томони Россияни бундай (Константин Затулин шахсларнинг бузғунчи фаолиятини тўхтатиш учун чоралар кўришга чақирди. Шунингдек, бундай хатти-ҳаракатлар минтақадаги тинчлик ва барқарорликка, шунингдек, Озарбайжон ва Россия ўртасидаги муносабатларга путур етказиши таъкидланди.
Боку ҳарбий суди 5 февраль куни тан олинмаган Тоғли Қорабоғнинг собиқ беш нафар раҳбарини умрбод қамоқ жазосига ҳукм қилди. Улар орасида собиқ президент Араик Арутюнян, Мудофаа армиясининг собиқ қўмондони Левон Мнатсаканян ва унинг ўринбосари Давид Манукян, собиқ ташқи ишлар вазири Давид Бабаян ҳамда парламентнинг собиқ спикери Давид Ишханян бор. Россиялик депутат ҳукмни ”қатағон” деб атаб, Арманистон бош вазири Никол Пашинянни танқид қилган.
“Аслида Бокуда Тоғли Қорабоғдаги арман аҳолисининг Совет Иттифоқи парчаланиши жараёнида намоён бўлган ўз тақдирини ўзи белгилаш ҳуқуқини қоралаб, ҳукм чиқаришди. Бу суд эмас, балки қатағон эди”, – дея даъво қилган у.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
