Президент қарори билан Тошкент шаҳри бошқарув тузилмасига ўзгартириш киритилди. Эндиликда пойтахт ҳокимлигида ҳоким ўринбосари — Уй-жой коммунал хўжалиги бош бошқармаси бошлиғи лавозими жорий этилди.

Қарорга кўра, мазкур лавозим уй-жой коммунал хўжалиги бўлинмаларидаги бошқарув ходимларининг чекланган умумий сони доирасида ташкил этилади. Янги ўринбосарга ҳужжатда бош муҳандисларга берилган барча ҳуқуқ ва ваколатлар татбиқ этилади.

Шунингдек, ушбу раҳбар пойтахтдаги кўп квартирали уйларни эксплуатация қилиш, муҳандислик-коммуникация тармоқларини таъмирлаш, шунингдек аҳолига кўрсатиладиган коммунал хизматлар сифатини назорат қилиш учун шахсан масъул бўлади.

Қарор билан кўп квартирали уйларни бошқариш тизимини такомиллаштириш бўйича қатор мақсадли кўрсаткичлар ҳам белгиланган. Жумладан, марказлашган иссиқлик тармоқларига уланган 1032 та кўп квартирали уйнинг энергия самарадорлигини ошириш, мажбурий бадал ва тўловлар ҳисобини тўлиқ шаффоф тизимга ўтказиш орқали дебитор қарздорликни камида 80 фоизга камайтириш вазифаси қўйилган.

2026—2030 йилларда халқаро молия институтлари маблағлари ҳисобидан 200 миллион доллар йўналтирилиб, кўп квартирали уйларни мукаммал таъмирлаш ва реконструкция қилиш режалаштирилган. Шунингдек, 2026—2027 йилларда республика бюджетидан 1 триллион сўм ажратиш ҳисобига уйларни таъмирлаш ҳамда уларга туташ ҳудудлардаги инфратузилмани яхшилаш дастури амалга оширилади.

Бундан ташқари, 2026 йилда 79,5 миллиард сўм маблағ эвазига 1991 йилгача қурилган кўп квартирали уйларнинг электрон паспортларини ишлаб чиқиш кўзда тутилган. Умуман, 2026 йилда республика ва маҳаллий бюджетлар ҳамда бошқа манбалар ҳисобидан жами 1,8 триллион сўм ажратилиб, кўп квартирали уйларни таъмирлаш ва ободонлаштириш бўйича йиғма дастур тасдиқланган.

• Президент
• Қарор
• Тошкент
• ҳоким