Reuters хабарига кўра, АҚШ давлат котибининг қурол-яроғларни назорат қилиш ва халқаро хавфсизлик масалалари бўйича ўринбосари Томас Динанно Женевада бўлиб ўтган глобал қуролсизланиш конференцияси чоғида Хитойни 2020 йилда яширин ядровий синовлар ўтказганликда айблаган ҳамда Пекинни ҳам қамраб оладиган стратегик қуролларни назорат қилиш бўйича кенг қамровли битим тузишни таклиф қилган.

Динанно АҚШ ҳукумати Хитой томонидан ядровий портлаш шаклида синовлар ўтказилганидан хабардорлигини билдирди. Унинг сўзларига кўра, Пекин синовларни яширишга уринган, хусусан сейсмик мониторинг тизимларининг ишлашига халақит берган. Қайд этилишича, синовлардан бири 2020 йил 22 июнь куни ўтказилган.

Хитойнинг қуролсизланиш бўйича элчиси Шен Сзян АҚШ томонининг айбловларига бевосита жавоб бермаган. Бироқ Хитой ядровий қурол масаласида ўзини вазмин ва масъулиятли тутишини таъкидлади ҳамда қуролланиш пойгасини кескинлашувига сабаб бўлишда АҚШни айблади.

Ядро синовларини тўлиқ тақиқлаш тўғрисидаги шартнома ташкилотининг ижрочи котиби Роберт Флойд эса ташкилот мониторинг тизимлари Хитой томонидан тахмин қилинаётган синовлар вақтида ҳеч қандай шубҳали ҳолатни аниқламаганини билдирди.

• АҚШ
• Хитой
• Ядровий қуроль