Тошкент ва Фарғона вилоятларида ўтказилган тезкор тадбирлар давомида йирик миқдордаги гиёҳвандлик воситаларининг ноқонуний муомаласи билан боғлиқ ҳолатлар аниқланди. Бу ҳақда Ички ишлар вазирлиги хабар берди.

Тошкентдаги меҳмонхоналардан бирининг спорт залида жойлашган жавондан 4 килограмм 800 грамм гиёҳвандлик моддаси топилган. Наркотик воситалар 325 та флаконга қадоқланган бўлган.

ИИВ маълумотига кўра, мазкур моддалар аввал наркошоп омборчиси бўлиб ишлаган ва ҳозирда қамоқда сақланаётган шахсга тегишли бўлган.

Ўтказилган тезкор тадбирлар натижасида жами 15 килограмм гашиш мойи ва опий ноқонуний муомаладан чиқарилган. Уларнинг умумий миқдори қарийб 75 минг дозага тенг экани қайд этилди.

Фарғонада 810 грамм гашиш билан уч киши ушланди

Йирик наркотик савдоси билан боғлиқ яна бир ҳолат Фарғона вилоятининг Данғара туманида аниқланган.

Маълум қилинишича, 1969-йилда туғилган, илгари Жиноят кодексининг 273-моддаси 5-қисми билан икки марта судланган шахс наркотик моддалар савдосига турмуш ўртоғи ва жиянини ҳам жалб қилган.

Улар Лаcетти автомобилининг люк қисмига 810 грамм гашиш яшириб, уни Тошкент вилоятида сотиш мақсадида олиб кетаётган вақтида қўлга олинган.

Мазкур ҳолат юзасидан Жиноят кодексининг 273-моддаси 6-қисми “а” банди билан жиноят иши қўзғатилган.

Ҳуқуқни муҳофаза қилувчи органлар томонидан тергов ва тезкор тадбирлар давом эттирилмоқда.