The Washington Post’нинг ёзишича, 23-апрель куни Лондонда бўлиб ўтадиган музокараларда Украина ва Европа делегатсиялари Қўшма Штатларнинг Қримни Россияга тегишли деб тан олиш ва фронт чизиғини ҳозирги ҳолатида музлатиб қўйиш таклифи билан юзлашади.

Аввалроқ Bloomberg агентлиги АҚШ тинчлик келишуви доирасида Қримни Россияга тегишли деб тан олиш имконини кўриб чиқишга тайёрлиги ҳақида хабар берган эди.

Нашрга кўра, Лондондаги учрашувда Қўшма Штатларнинг таклифлари Вашингтон томонидан Қримни Россия ҳудуди сифатида расмий тан олишни ва келажакда Россияга қарши санксияларни бекор қилишни ўз ичига олади. Бунинг эвазига Москва Украинадаги ҳарбий ҳаракатларни тўхтатиши керак.

Украина президенти маслаҳатчисининг сўзларига кўра, Қўшма Штатларнинг таклифларида “Киев рози бўлиши мумкин бўлган жиҳатлар бор, аммо рози бўлмайдиганлари ҳам мавжуд”. Ғарб расмийларидан бири Вашингтоннинг Украина томонига кўрсатаётган босим даражасини “ҳайратланарли” деб атаган.

The Washington Post’нинг ёзишича, Украинанинг иттифоқчилари ҳудудий муросалар эвазига хавфсизлик кафолатлари ва тикланиш дастурларига эришишни умид қилмоқда.

• АҚШ
• Музокара
• Россия
• Украина
• Уруш
• Европа