Жорий йилнинг 1 ноябридан АҚШ Хитойга нисбатан қўшимча 100 фоизлик бож тўлови жорий этади. Бу ҳақда Қўшма Штатлар Президенти Доналд Трамп ўзининг Truth Social тармоғида ёзди.

“2025 йил 1 ноябрдан бошлаб (ёки Хитой томонидан амалга ошириладиган кейинги ҳаракатлар ва ўзгаришларга қараб олдинроқ) АҚШ Хитойга қарши 100 фоизлик тариф жорий этади, бу улар ҳозир тўлаётган ҳар қандай тарифдан ташқари бўлади”, – деб ёзади Трамп.

Шунингдек, шу санадан бошлаб АҚШ муқим аҳамиятга эга дастурий таъминот учун экспорт назоратини ҳам жорий қилади.

Трампнинг сўзларига кўра, бу чора Хитой томонидан 1 ноябрдан бошлаб деярли барча ишлаб чиқарилган маҳсулотларга нисбатан жорий этилиши режалаштирилаётган экспорт чекловларига жавоб бўлади.

“Бу халқаро савдода мисли кўрилмаган ҳолат бўлиб, бошқа давлатлар билан муносабатларда ахлоқий камситишдир”, – АҚШ раҳбари.

Янги қоидалар бўйича, Хитойда ишлаб чиқарилган ҳатто оз миқдорда ноёб ер металлари сақловчи маҳсулотларни экспорт қилувчи хорижий компаниялар ҳам махсус экспорт лицензияси олишлари керак бўлади. Бу талаб нафақат металларга, балки уларни қазиб олиш, қайта ишлаш, утилизация ва магнит материаллар ишлаб чиқариш технологияларига ҳам тааллуқли.

Лицензия икки мақсадли маҳсулотлар – яъни фуқаролик ва ҳарбий соҳада ишлатилиши мумкин бўлган материаллар учун ҳам мажбурий бўлади. Ҳарбий истеъмолчиларга мўлжалланган экспорт аризалари эса автоматик равишда рад этилади.

Хитой ҳукумати бу чораларни “миллий хавфсизлик ва давлат манфаатларини самаралироқ ҳимоя қилиш, шунингдек, халқаро мажбуриятларни бажариш, жумладан, тарқалиш устидан назоратни кучайтириш” зарурати билан изоҳлаган.

• АҚШ
• Трамп
• Хитой