Паркент туманида анъанавий «Узум сайли» халқаро фестивали қизғин ва кўтаринки руҳда давом этмоқда. 21–22 август кунлари ўтказилаётган фестиваль Паркентнинг узумчилик анъаналари, бетакрор табиати ва туристик салоҳиятини кенг намойиш этишга хизмат қилмоқда.

Фестиваль давомида ташриф буюрувчилар турли навдаги узумлар, миллий таомлар, ҳунармандчилик маҳсулотлари ва ҳудудга хос анъаналар билан яқиндан танишмоқда. Шунингдек, агротуризм ва энотуризм йўналишлари ҳам кенг тарғиб қилиниб, Паркентни маҳаллий ва хорижий сайёҳлар учун янада жозибадор туристик масканга айлантиришга эътибор қаратилмоқда.

Тадбирлар давомида Паркентнинг гўзал табиати, узумзорлари, миллий қадриятлари ва меҳмондўстлиги намойиш этилмоқда. Фестивальга ташриф буюрган меҳмонлар учун турли кўргазмалар, маданий дастурлар ва кўнгилочар тадбирлар ташкил этилган.

Кечки пайтларда эса таниқли санъаткорлар иштирокидаги мусиқий дастурлар бўлиб ўтмоқда. Жонли ижролар ва кўтаринки кайфият фестиваль муҳитини янада жонлантириб, ташриф буюрувчиларга унутилмас таассурот улашмоқда.

«Узум сайли» халқаро фестивали нафақат узумчиликни тарғиб қилиш, балки Паркентнинг туризм, миллий таомлар, ҳунармандчилик ва маданий меросини ягона туристик маҳсулот сифатида намойиш этишга хизмат қилмоқда.

• фестиваль