ТикТокъда “Доcтор Фоод” номи билан танилган, 8 миллиондан ортиқ обуначига эга блогер Жорж Диб Ливанда қўлга олинди. Бу ҳақда Тҳе Натионал хабар берди.

Маълум қилинишича, Диб гиёҳванд моддалар билан боғлиқ жиноятлар бўйича қидирувда бўлган. Унга нисбатан иккита алоҳида ҳибсга олиш ордери чиқарилган. Шунингдек, блогер аввалроқ айни иш бўйича сиртдан умрбод озодликдан маҳрум қилиш жазосига ҳукм қилинган.

Ливан Ички хавфсизлик кучлари маълумотига кўра, Жорж Диб Ҳалба суд бўлинмаси ходимлари томонидан қўлга олинган. Ҳуқуқ-тартибот идоралари уни қарийб бир ой давомида кузатган. Кузатув давомида блогернинг Аккар ҳудудидаги Раҳбе шаҳрида яшаётгани аниқланган. Шундан сўнг унинг уйида тинтув ўтказилиб, Диб ҳибсга олинган.

Қайд этилишича, блогер қўлга тушмаслик учун автомобили ва телефон рақамини тез-тез алмаштирган. Шунингдек, контент суратга олганидан кейин жойни тезда тарк этиб, ўз ҳаракатларини кузатишни қийинлаштиришга уринган. Бироқ узоқ давом этган кузатув натижасида унинг манзили аниқланган.

Дибнинг номи 2024-йилда гиёҳванд моддалар билан боғлиқ терговдан сўнг кенг жамоатчиликка маълум бўлган. Ливан расмийларига кўра, унинг корхоналарида ишлаб чиқарилган айрим қандолат ва озиқ-овқат маҳсулотларидан гиёҳванд моддалар аниқланган. Ушбу маҳсулотларни Форс кўрфази давлатларидан бирига юбориш режалаштирилгани айтилган.

Шундан сўнг Байрутдаги Рафиқ Ҳарири халқаро аэропортида гиёҳванд моддалар бўлиши мумкинлиги тахмин қилинган озиқ-овқат маҳсулотлари мусодара қилинган. Дибга нисбатан гиёҳванд моддаларни ишлаб чиқариш, сотиш ва хорижга контрабанда йўли билан олиб чиқиш айбловлари бўйича ҳибсга олиш ордери берилган.

Ливан суди Жорж Дибни гиёҳванд моддаларни ишлаб чиқариш ва контрабанда қилиш айбловлари бўйича сиртдан умрбод озодликдан маҳрум қилиш жазосига ҳукм қилган.

Блогер эса ўзига қўйилган айбловларни аввал ҳам рад этган. У ижтимоий тармоқлардаги обуначиларини мазкур даъволарга ишонмасликка чақирган.

Жорж Диб ТикТокъда таомлар, ресторанлар ва турмуш тарзига оид видеолари билан машҳур. Унинг платформадаги обуначилари сони 8 миллиондан ошади. Жиддий айбловлар ва аввалги суд қарорига қарамай, у ижтимоий тармоқларда контент жойлаштиришда давом этган.

Ҳозирда қўлга олинган блогер янги суд жараёни доирасида Ливаннинг тегишли суд органларига топширилиши кутилмоқда.

Эслатиб ўтамиз, аввалроқ Россия суди блогер Гусейн Гасановни сиртдан 4 йилга озодликдан маҳрум қилган эди.