Ўзбекистон ва Озарбайжон фуқароларининг пенсия ҳуқуқларини таъминлашга қаратилган янги келишув имзоланди. Унга кўра, икки давлат ҳудудида меҳнат қилган фуқароларнинг иш стажи пенсия тайинлашда ўзаро ҳисобга олинади.

Мазкур битим 23 август куни Тошкентда Ўзбекистон Президенти Шавкат Мирзиёев ва Озарбайжон Президенти Илҳом Алиев ўртасидаги музокаралар якунида имзоланган ҳужжатлар қаторидан жой олди.

Янги тартиб, аввало, икки давлатда меҳнат фаолиятини олиб борган фуқароларнинг пенсия олиш ҳуқуқини аниқлашда қулайлик яратади. Агар фуқаронинг бир мамлакатдаги иш стажи пенсия тайинлаш учун етарли бўлмаса, иккинчи давлатда тўпланган тегишли иш стажи ҳам ҳисобга олинади.

Бунда ҳар бир давлат фуқаронинг ўз ҳудудида орттирган иш стажига мос равишда пенсиянинг тегишли қисмини тайинлайди ва ҳисоблаб чиқади.

Келишувда фуқароларнинг бошқа мамлакатга кўчиб ўтиши ҳам назарда тутилган. Яъни, шахс бошқа давлат ёки учинчи мамлакатга кўчган тақдирда ҳам, унга аввал тайинланган пенсия камайтирилмайди, тўхтатилмайди ёки бекор қилинмайди.

Шунингдек, фуқаро ўз хоҳишига кўра пенсиясини уни тайинлаган давлат ҳудудида олишни давом эттириши ёки тўловларни иккинчи давлатга ўтказишни сўраши мумкин.

Пенсия тайинлаш, қайта ҳисоблаш ёки тўловларни амалга ошириш билан боғлиқ мурожаатларни фуқаро яшаётган давлатдаги ваколатли ташкилотга топшириши мумкин. Зарур ҳолатларда мурожаат иккинчи давлатга берилган деб ҳам ҳисобланади.

Икки мамлакатнинг ваколатли идоралари пенсия тайинлаш ва тўлаш учун зарур бўлган маълумот ҳамда ҳужжатларни ўзаро алмашади. Бу фуқароларнинг турли идораларга қайта-қайта мурожаат қилиш заруратини камайтириб, жараённи соддалаштиришга хизмат қилади.

Келишув ҳозирча имзоланиши билан дарҳол кучга кирмайди. Унинг амал қилиши учун тегишли тартиб-таомиллар якунланиши керак. Битимни амалиётга жорий этишнинг ташкилий ва техник жиҳатлари эса алоҳида Маъмурий келишув асосида белгиланади.