“Нарра” тўфони Хитойнинг жануби ва Ветнамнинг шимолий ҳудудларида вазиятни кескинлаштирди. Кучли ва узоқ давом этган ёмғирлар ортидан дарёлар сатҳи кўтарилиб, сув тошқинлари ҳамда кўчкилар юзага келди. Табиий офат оқибатида ўн минглаб одамлар хавфсиз жойларга кўчирилди.

Хитойнинг Гуанси провинсиясида тошқинлар сабаб қарийб 54 минг киши эвакуатсия қилинди. Уларнинг 8 087 нафари вақтинчалик бошпаналарга жойлаштирилган. Ҳудуддаги 15 та дарёда сув сатҳи хавфли кўрсаткичдан ошган. Чунсзуо шаҳрининг айрим қисмларини сув босиб, қутқарувчилар қайиқ ва бошқа махсус воситалар ёрдамида аҳолига ёрдам кўрсатган.

Тўфон бир неча кундан буён Бейбую, яъни Тонкин қўлтиғи устида секин ҳаракатланмоқда. Шу сабабли Хитойнинг жанубий вилоятларида кучли ёғингарчиликлар давом этиши кутилмоқда.

Ветнам шимолида ҳам вазият оғир. Кучли ёмғирлар Ланг Сон ва бошқа провинсияларда сув тошқинлари ва ер кўчкиларини келтириб чиқарди. Камида бир киши ҳалок бўлган, минглаб хонадонлар хавфсиз ҳудудларга кўчирилган.

Маҳаллий метеорологлар “Нарра”нинг қуруқликка чиқмаслигини, бироқ унинг секин ҳаракатланиши сабаб шимолий ҳудудларда ёғингарчиликлар яна давом этиши мумкинлигини билдирмоқда. Айрим ҳудудларда бир неча юз миллиметргача ёмғир қайд этилган.

Табиий офат инфратузилмага ҳам жиддий зарар етказган. Айрим йўллар сув остида қолган, транспорт ҳаракати чекланган, турар жойлар ва қишлоқ хўжалиги ерлари зарар кўрган.

Тўфон Хитойнинг космик дастурига ҳам таъсир кўрсатди. Об-ҳаво шароити сабаб “Чанғе-7” Ой миссиясининг учирилиши кечиктирилди. Миссияни Хайнан провинсиясидаги Венчан космик парвозлар марказидан учириш режалаштирилган эди.

Мутахассислар “Нарра”нинг секин силжиши сабаб сув тошқинлари ва кўчкилар хавфи сақланиб қолаётганидан огоҳлантирмоқда.