Оқ уй матбуот котиби Карин Жан-Пер АҚШ Президенти Жо Байденга Россияда ҳибсга олинган баскетболчи Бриттни Грайнернинг мактубини ўқиб берганини маълум қилди.

Шунингдек, АҚШ Миллий хавфсизлик кенгаши расмий вакили Эдриенн Уоцон Қўшма штатлар президенти Жо Байден чет эл мамлакатларида гаровга олинган ёки ноқонуний равишда қамоққа ҳукм қилинган Америка фуқаролари озод қилиниши зарурлиги ҳақида айтганини таъкидлади.

“Президент Байден хорижда гаровга олинган ёки ноқонуний ҳибсда сақланаётган барча АҚШ фуқаролари, жумладан Бриттни Грайнер ҳам озод этилиши кераклигини айтди. АҚШ ҳукумати Грайнерни уйига олиб келиш учун барча мавжуд воситалардан фойдаланган ҳолда фаол ишлашда давом этади", – дейди у.

Уоциннинг гапларига кўра, Жо Байденнинг жамоси баскетболчи қизнинг оиласи билан доимий алоқада бўлиб турибди.

“Президентнинг жамоаси Бриттнининг оиласи билан доимий алоқада бўлиб турибди. Вакилларимиз сўнгги ҳафталарда Бриттнининг турмуш ўртоғи билан бир неча бор гаплашди. Оқ уйнинг гаровга олинганлар бўйича махсус вакили Бриттни оиласи, жамоадошлари ва уни қўллаб-қувватловчилар билан учрашган. Улар билан ҳамкорлик йўлга қўйилган", - дейди Америка Миллий хавфсизлик кенгашининг расмий вакили.

Шунингдек, “Биз Грайнерни уйга қайтариш учун барча имкониятларни ишга соламиз", - деди Оқ уй матбуот котиби Карин Жан-Пер.

Маълумот учун, 4-июл - АҚШ Мустақиллиги кунида баскетбол бўйича АҚШ аёллар терма жамоаси билан биргаликда икки карра Олимпия чемпиони ҳисобланган Бриттни Грайнер Москвадаги қамоқхонадан Президент Жо Байденга мактуб йўллаб, озод қилиниши учун ёрдам беришини сўраган эди.

У жорий йилнинг 17-феврал куни “Шереметьево" аеропортида қўлга олинган ва гиёҳванд моддалар контрабандасида (Россия Федерацияси Жиноят кодексининг 229.1-моддаси 2-қисми) ҳамда уларни ноқонуний ташишда (Россия Федерацияси Жиноят кодексининг 228-моддаси 1-қисми) айбланган. Баскетболчи ҳозирда қамоқхонада сақланмоқда.

• АҚШ
• Баскетбол
• Байден
• Россия
• Спорт