Xabardor.uz таҳририяти жойлардаги муаммоларни ёритишда ҳамда уларга мутасаддиларнинг эътиборини қаратишда давом этади.

Бу сафарги мурожаат  Хоразм вилояти Иқтисодиёт маркази ҳисобланган Ҳазорасп туманининг фуқароларидан келиб тушган. 

Туман аҳолиси ёғингарчилик мавсумида лой, ёз кунларида эса чанг бўлиб кетадиган нафақат Ҳазорасп бозорига, балки маҳаллардаги кўчаларга мутасаддилар эътибор қаратишини сўрашмоқда.

“Туманимизда ёғингарчилик бошланганда бозоримиз кўлга айланади. Бемалол одам боласи сузса бўлади бу жойда. Бунақа сув ҳатто Амударёда ҳам йўқ, масъуллар шу сувларни Амударёга олиб бориб қуйса бўларди. Қайсидир чўлда сунъий ёмғир ёғдиришибди. Ундан кўра, биздаги муаммоларга ҳам бир қарашсин. Неча йиллардан бери шу аҳвол, бирон нима демоқчи бўлсак, дарров оғзимизга қопқоқ босишади… Биз қишни ботқоқликда, ёзни эса чанг ичида ўтказамиз!” 

Таҳририятга келиб тушган суратлардан ҳам кўриниб турибдики, ёғингарчилик мавсумида бозор аҳволи фуқароларга бир қатор муаммолар туғдиради. Жумладан, ҳаркатланиш қийин, сувлар тўпланиб қолаётгани туфайли савдогарларнинг ҳам молларига бир қанча зарар келтирмоқда. Кўриб турганингиздай ушбу бозордаги йўллардан юриш имконсиз. 

Мутасаддилар қиш ва ёз ойларида аҳоли учун қийинчиликлар туғдираётган музкур муаммонинг ижобий ҳал этилишига эътибор қаратишади, деган умиддамиз.

• Бозор
• Ҳазорасп
• Мурожаат
• Хоразм