Ижтимоий шароити оғир аёлларни алдаб Туркияга сотиб юбормоқчи бўлган уч киши қўлга олинди. Бу ҳақда Ички ишлар вазирлиги хабар қилди.

Маълум қилинишича, 1997, 1998 ва 2003 йилларда туғилган бир нафар аёл ва икки нафар эркакдан иборат жиноий гуруҳ ўзаро олдиндан тил бириктириб, оилавий шароити оғир бўлган аёлларни чет элга сотиб юбормоқчи бўлган.

Улар Сурхондарё ва Қашқадарё вилоятларидан бўлган икки нафар аёлнинг ишончига кириб, уларни Туркияга ишлаш учун жўнатишни ваъда қилишган. Аслида эса, моддий манфаат эвазига ушбу фуқароларни Истанбул шаҳрига шаҳвоний эксплуатация қилишни режалаштирган.

Шу йилнинг 3 февраль куни жиноий гуруҳ аъзолари жабрланувчиларни Тошкент–Истанбул авиарейси орқали хорижга юбориш учун ҳужжатларни расмийлаштираётган вақтда ашёвий далиллар билан ушланган.

Ҳозирда ҳолат юзасидан жиноят иши очилиб, дастлабки тергов ҳаракатлари олиб борилмоқда.

• Аёллар
• Одам савдоси
• Тошкент
• Туркия