The Jerusalem Post нашрининг манбаларига таяниб хабар беришича, Исроил Қўшма Штатларни агар Теҳрон баллистик ракеталар бўйича белгиланган “қизил чизиқ”дан ўтса, Тел-Авив Эронга қарши якка ҳолда ҳарбий зарба беришга тайёрлиги ҳақида огоҳлантирган.

Исроилнинг юқори мартабали ҳарбий амалдорларининг сўзларига кўра, Исроил томони мамлакат мавжудлигига таҳдид соладиган қуроллар тизимини қайта тиклашга йўл қўймаслигини қатъий таъкидлаган ва ҳаракатлар турини танлаш ҳуқуқини ўзида сақлаб қолишини билдирган. Исроил ҳарбийлари АҚШ томонига ракета дастурининг самарадорлигини пасайтиришга қаратилган тезкор концепцияларни ҳам тақдим этган. Бу режалар орасида Эроннинг муҳим объектларига зарбалар бериш ҳам бор.

Исроил ҳарбий амалдорларидан бири ҳозирги вазиятни Эроннинг ракета инфратузилмасига кучли зарба бериш ва Исроил ҳамда қўшни давлатларга бўлган фаол таҳдидларни нейтраллаш учун “тарихий имконият” сифатида баҳолаган.

11 февраль куни Исроил бош вазири Бинямин Нетаняху АҚШ президенти Доналд Трамп билан Вашингтонда учрашиши режалаштирилган. Учрашувда асосий мавзу – АҚШ ва Эрон ўртасидаги музокаралар, жумладан Эроннинг ядро дастури ва унинг минтақавий таъсири бўлади.

• Eron
• Havo hujumi
• Isroil