Бугун, 23 май куни Лондонда ўз ишини бошлаган Бутунжаҳон таълим форумида Ўзбекистон Республикасидан Олий ва ўрта махсус таълим вазирлиги, Халқ таълими вазирлиги ва Президент таълим муассасалари агентлиги раҳбарлари ва масъул ходимларидан иборат делегация иштирок этмоқда. Бу ҳақда Ташқи ишлар вазирлиги маълум қилди.

Буюк Британия ҳукумати кўмагида ташкил этилган мазкур тадбир таълим муассасалари, ихтисослаштирилган касб-ҳунар таълими ташкилотлари раҳбарлари ва бошқа соҳавий тузилмалар вакилларининг йиллик энг йирик йиғилиши ҳисобланади.

Бу йил форум “Таълим: бирга олға интилиш – кучлироқ, ишончлироқ, яхшироқ” шиори остида ўтказилмоқда. Тадбирда дунёнинг 115 давлатидан делегатлар иштирок этиб, улар соҳанинг долзарб тенденсиялари ва муаммоларини муҳокама қилади, таълимнинг қулайлиги, сифати ва инклюзивлигини ошириш бўйича инновацион ечимлар, фикр ва тажриба билан алмашади.

Таъкидланишича, республика делегацияси яқин кунларда Ўзбекистоннинг Лондондаги Элчихонаси кўмагида Буюк Британиянинг расмий ва академик доиралари вакиллари билан бир қатор икки томонлама учрашувлар ўтказади.

Шунингдек, Ўзбекистон Элчихонасида мамлакатнинг таълим тизимини ривожлантириш стратегияси, Буюк Британия билан бу борадаги ҳамкорликни кенгайтириш имкониятлари тақдимот ва брифинг ўтказиш режалаштирилган.

• Форум
• Жаҳон
• Олий таълим
• ТИВ
• Таълим
• ХТВ