Жорий йилнинг 27 апрель куни Бухоро вилоятида ЙПХ ходими иштирокида йўл-транспорт ҳодисаси содир бўлди. Бу ҳақда вилоят Йўл ҳаракати хавфсизлиги бошқармаси маълум қилди.

Қайд этилишича, соат 09:05 да Бухоро вилояти Вобкент тумани Имом Бухорий кўчасида 1987 йилда туғилган ЙПХ ходими Ё. Мавлонов ўзига тегишли Cobalt русумли автомобилни бошқариб кетаётиб, пиёдалар ўтиш жойидан йўлни кесиб ўтаётган 2009 йилда туғилган С.Н.ни уриб юборган.

Ҳодиса оқибатида пиёда енгил тан жароҳатлари олган. Ходим жабрланувчига биринчи тез тиббий ёрдам кўрсатиш мақсадида уни шифохонага олиб борган.

Маълумотларга кўра, ходим хизмат вақтида, ҳушёр ҳолатда бўлган ва автомобилни бошқариш учун зарур барча ҳужжатларга эга бўлган.

Мазкур ҳолат юзасидан Вобкент тумани прокуратураси томонидан терговга қадар текширув ҳаракатлари олиб борилмоқда.

Ижтимоий тармоқларда ушбу ҳодиса “ёпиб юборилмоқда” деган асоссиз хабарларни тарқатмаслик сўралган. Ҳолат тўлиқ ўрганилиб, қонуний қарор қабул қилиниши таъкидланган.