“Demokrat.uz интернет нашри раҳбари Фазлидинхон Меҳмонов ва блогер Азиз Ғоипназаровга нисбатан жиноят иши қўзғатилди”, – дея хабар бермоқда Тошкент шаҳри Ички ишлар бош бошқармаси.

Уларга нисбатан иш Жиноят кодексининг 165-моддаси 3-қисми “а” (Жуда кўп миқдорда товламачилик) банди билан очилган.

Маълум қилинишича, 2025 йилнинг 15 декабрь куни гумонланувчи Ғоипназаров Сергели туманидаги автосалонлардан бирининг фаолиятини обрўсизлантирувчи видеоматериал тайёрлаб, интернет тармоғида жойлаштирган.

Шундан сўнг Demokrat.uz интернет нашри раҳбари Меҳмонов Ғоипназаров томонидан тайёрланган видеолавҳани ижтимоий тармоқлардан ўчириш ҳамда ушбу нашр томонидан тайёрланган, тадбиркорни обрўсизлантирувчи алоҳида видеолавҳани ОАВда жойламаслик эвазига, товламачилик йўли билан жабрланувчидан жами 50 минг доллари талаб қилган.

Фазлидинхон Меҳмонов жабрланувчидан 29 январь куни 3 минг долларини олиб, сўнг, 10 февраль куни 17 минг долларни олаётган вақтида далилий ашёлар билан қўлга олинган.

Бошқарма мазкур шахсларнинг ҳаракатларидан жабр кўрган фуқаролардан ички ишлар органларига ёки 102 рақамига мурожаат қилишларини сўраган.

Аввалроқ Taftish.uz сайтининг беш нафар ходими товламачилик ва фирибгарликда гумонланиб процессуал тартибда ушланганди.

• ИИБ
• Жиноят
• Тошкент