Тошкент шаҳрида бўлиб ўтаётган “Декларациялар мулоқоти” халқаро форумининг иккинчи иш куни ҳам фаол мулоқотлар руҳида ўтмоқда.

Мазкур форум доирасида ўз фикрлари билан ўртоқлашар экан, Сенат раисининг биринчи ўринбосари Содиқ Сафоев Ўзбекистоннинг хорижий ҳамкорлари билан мулоқот учун тизимли платформа яратиш муҳим эканлигини таъкидлайди.

“Бугун ўз ишини бошлаятган форум айнан шу мақсадга қаратилган.

Чунки бугунги кунда башарият юзланаётган кескин зиддиятларни ечиш, биринчи навбатда дунёдаги асосий муаммо – ўзаро ишонч дефицити, маданият ва цивилизациялар ўртасида ўзаро тушиниш танқислигини бартараф этиш билан боғлиқдир.

Шак-шубҳа йўқки, ҳозирги замондаги низолар, халқаро терроризм, экстремизм ва зўравонликнинг тубида, энг аввало, жаҳолат ва адоват, иррационал, олдинги даврлардан мерос қолган, дунёқараш ётибди.

Уларга қарши кураш, биринчи навбатда, маънавият, маърифат, талим, мулоқот эвазига олиб борилмоғи лозим.

Яна ва яна такрорлашдан тоймаслигимиз лозим: терроризм, тажовузкор экстремизмни муайян бир дин билан боғлаш зинҳор ва зинҳор мумкин эмас. Тадқиқотлар шуни англатадики, диний эътиқод радикал оқимларга қўшилишнинг асосий омили эмас.

Динлар, маданиятлараро бағрикенглик ва уйғунликни қарор топтириш, ўрнашиб қолган стереотиплар ва янглиш фикрларга қарши курашиш – умумий вазифамиздир.

Аминманки, ушбу форум айнан шу мақсадга хизмат қилади”, – дейди Сафоев.

• Diniy aqidaparastlik
• Diniy ekstremizm
• Форум
• Сафоев