Таиланд расмийлари Ўзбекистон, Колумбия ва Мексика фуқаролари учун 15 кунлик визасиз кириш тартибини жорий этишни таклиф қилди. Бу ҳақда The Nation нашри Таиланд Туризм ва спорт вазирлигига таяниб хабар берди.

Ташаббус виза ҳужжатларини расмийлаштиришдаги кечикишларни камайтириш ва сайёҳлар оқимини оширишга қаратилган. Таклиф халқаро авиаташувчилар дуч келаётган муаммолар ортидан илгари сурилган. Жумладан, Emirates авиакомпанияси Таиланд туризм идорасига мурожаат қилиб, виза ўз вақтида расмийлаштирилмагани сабабли Мексикадан учаётган ҳар бир рейсда 20–30 нафар йўловчи қолиб кетаётганини билдирган.

Таиланд Туризм ва спорт вазири Сурасак Phancharoenvorakul виза расмийлаштиришдаги кечикишлардан вазирлик хабардор эканини тасдиқлаган. Вазирлик 9 ноябрь куни Виза сиёсати қўмитаси йиғилишида Колумбия, Мексика ва Ўзбекистон фуқаролари учун 15 кунлик визасиз киришни маъқуллаш бўйича таклиф киритишни режалаштирган.

Ҳозирда Ўзбекистон фуқаролари Таиланд визасини thaievisa.go.th сайти орқали расмийлаштириши мумкин. Виза йиғими 40 долларни ташкил этади. Аризаларни кўриб чиқиш муддати белгиланган тартибда 10 кунгача бўлиши керак, бироқ амалда тасдиқ ўртача 15 кун ичида юборилмоқда.

Маълумот учун, 2026 йилнинг дастлабки тўрт ойида Таиландга 16 291 нафар Ўзбекистон фуқароси ташриф буюрган. Ҳозирча 15 кунлик визасиз режим бўйича таклифнинг расман тасдиқлангани ва кучга кириш санаси ҳақида маълумот берилмаган.