АҚШ президенти Дональд Трамп Эрон билан можарони ҳал қилиш ва урушни якунлаш учун Россия ёки Хитойдан ёрдам сўраш ниятида эмаслигини билдирди. Бу ҳақда у APEC саммити доирасида Fox News телеканалига берган интервьюсида маълум қилди.
Журналистнинг Вашингтон Теҳрон билан урушни тугатиш учун Москва ёки Пекинга мурожаат қилиши мумкинлиги ҳақидаги саволига Трамп: «Бизга ёрдам керак эмас», деб жавоб берди.
Унинг таъкидлашича, АҚШ Эроннинг ҳарбий-денгиз кучларини йўқ қилган ва ҳарбий-ҳаво кучларига зарбалар берган. Трамп Эрон келишув тузишни истаётганини айтиб, Вашингтон Теҳрон билан узоқ муддатли битимга эришишни мақсад қилганини таъкидлади. Унинг сўзларига кўра, музокаралар давом этмоқда.
АҚШ президенти, шунингдек, Эроннинг ядровий объектларига берилган зарбалардан кейин Теҳрон биологик қурол яратишга ўтганини даъво қилди. Эрон томонидан «ифлос бомба» қўлланиши мумкинлиги ҳақидаги саволга эса бундай ҳолат юз берса, АҚШ кескин жавоб беришини билдирди.
Трамп интервьюда Россия ва Украина ўртасидаги урушга ҳам тўхталди. У 2020-йилги президентлик сайловларида мағлуб бўлмаганида, бу можаро бошланмаган бўларди, деган фикрини такрорлади. Шунингдек, уруш тез орада «у ёки бу тарзда» якунланишини айтди.
Хитой билан муносабатларга тўхталар экан, Трамп Пекин билан алоқаларни «дўстлик ва ҳурмат муносабатлари» деб таърифлади. У Си Сзинпин билан учрашуви ва икки давлат ўртасидаги ҳамкорликни ижобий баҳолади.
Америка етакчиси, шунингдек, ядровий қуроллар сони, Хитойнинг разведка фаолияти, Nvidia компанияси атрофидаги вазият ва АҚШдаги айрим технологик ҳамда авиация тизимларида кузатилган узилишлар ҳақида фикр билдирди.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!