Сурхондарё вилояти Қумқўрғон туманида математика ўқитувчисини ишга қабул қилиш ва унга дарс соатлари ажратиш эвазига 4,5 млн сўм пора олган мактаб директори 2 йилга озодликдан маҳрум қилинди.

Суд ҳужжатларига кўра, директор П.Х. мактабда 15 соатлик бўш иш ўрни борлигини айтиб, ишга кириш учун фуқаро Ж.Ғ.дан пул талаб қилган. Фуқаро дастлаб 500 минг сўм берган, қолган 4 млн сўмни кейинроқ беришга келишилган.

Шундан сўнг Ж.Ғ. ҳуқуқни муҳофаза қилувчи органларга мурожаат қилган. Тезкор тадбир давомида директор 4 млн сўмни олаётган вақтида қўлга олинган.

Суд П.Х.ни Жиноят кодексининг 210-моддаси 1-қисми билан айбли деб топиб, 2 йилга озодликдан маҳрум қилган. Шунингдек, у 2 йил давомида давлат иштирокидаги ташкилотларда мансабдор ва моддий жавобгарлик юклатилган лавозимларда ишлаш ҳуқуқидан маҳрум этилган.