Украина Олий Радасида 240 нафар депутат Дмитрий Кулебанинг истеъфоси учун овоз берган, фақат бир киши бунга қарши чиққан. Сиёсатчи ҳафта бошида бир қанча вазирлар ва бош вазир ўринбосарлари каби истеъфосини Украина парламентига тақдим этганди. 5 сентябрь куни Олий Радада бу масала бўйича овоз бериш бўлиб ўтган.

Жараёнда Кулеба иштирок этмаган ва ҳисобот тақдим қилмаган. Украина ТИВ раҳбарлигига асосий номзод ташқи ишлар вазирининг амалдаги биринчи ўринбосари Андрей Сибига бўлиши кутилмоқда.

Украиналик сиёсатчи Дмитрий Кулеба 1981 йил 19 апрелда Суми шаҳрида туғилган. 2003 йилда Тарас Шевченко номидаги Киев миллий университетининг Халқаро муносабатлар институтини халқаро ҳуқуқ мутахассислиги бўйича имтиёзли диплом билан тамомлаган.

2019 йил августдан 2020 йил мартгача — Украинанинг Европа ва Евроатлантика интеграцияси бўйича бош вазир ўринбосари лавозимида фаолият юритган ва 2020 йил 4 мартдан Украина ташқи ишлар вазири этиб тайинланган эди.

Шунга қарамасдан, собиқ вазир янги лавозимда иш бошлаганлиги айтилмоқда.“Дмитрий Кулеба Гарвард университетининг ЖФК бошқарув мактаби қошидаги “Белфер” номли фан ва халқаро муносабатлар марказининг катта илмий ходими бўлди”, – дея хабар тарқатган ўқув муассаса веб-сайти.

• Кулеба
• Украина