АҚШнинг “Euroasianet” интернет нашрида “Доналд Трамп Марказий Осиёга ташриф буюрган биринчи АҚШ Президенти бўла оладими?” сарлавҳали мақола эълон қилинди. Мақолада Ўзбекистон Президентининг АҚШ етакчиси билан жорий йил 5 сентябрда ўтказган телефон orqali мулоқоти ва Трампнинг Марказий Осиё мамлакатларига ташриф буюриш режалари ҳақида сўз борада. “Телефон орқали мулоқот чоғида Ўзбекистон Президенти Шавкат Мирзиёев бу ғояни илгари сурди” – дейилган материалда.

Муаллифга кўра, АҚШ раҳбари Марказий Осиёга ташриф буюрадими ёки йўқ, ҳозирча номаълум. Ўзбекистон томони тарқатган расмий баёнотга кўра, 5 сентябрь куни бўлиб ўтган телефон orqali мулоқот чоғида Шавкат Мирзиёев АҚШ етакчисини “қулай вақтда” Ўзбекистонга ташриф буюришни таклиф қилди. АҚШнинг Ўзбекистондаги элчиси ўзбек журналистларига таклиф “ижобий қабул қилинганини” айтди.

“Вашингтондаги манбаларнинг маълум қилишича, 9 сентябрь ҳолатига кўра, Марказий Осиёга ташриф бўйича ҳеч қандай қарор қабул қилинмаган. Ўзбекистон Трампнинг иккинчи Президентлик муддатида Оқ уй билан мулоқот қилишда энг фаол Марказий Осиё давлати бўлмоқда” – дейилади материалда.

Нашрда маълум қилинганидек, шу йил апрель ойида Ўзбекистон ташқи ишлар вазири бошчилигидаги делегация Оқ уйда бўлди. Ўзбекистон, шунингдек, АҚШдан муҳожирларни депортация қилиш учун бир неча чартер рейсларини ташкил қилди.

“Апрель ойида Ўзбекистон делегацияси Америка компаниялари билан кончилик бўйича бир қанча шартномалар имзолади. Икки мамлакат етакчилари ўртасида кечган телефон мулоқотида ҳам муҳим фойдали қазилмалар ва иқтисодий ҳамкорликнинг бошқа соҳалари муҳокама қилинди” – дея айтилган манбада.

Муаллиф, шунингдек, Ўзбекистон етакчиси Шавкат Мирзиёев 2018 йилда Оқ уйга расмий ташриф билан келганини ва Ўзбекистон раҳбари муносиб кутиб олингани ҳақида ёзган.

• Шавкат Мирзиёев
• Ташриф
• Трамп
• muloqot