10 сентябрь куни тонгда бутун Франция бўйлаб “Bloquons Tout” (“Ҳаммани тўсамиз”) ҳаракати томонидан уюштирилган норозилик намойишлари бошланди. Намойишчилар автомагистралларни тўсиб, темир йўл транспорти ишини издан чиқарган. Бу ҳақда BBC нашри хабар бермоқда.

Ички ишлар вазири Бруно Ретаёга кўра, мамлакат бўйлаб 80 минг, жумладан Парижда 6 минг хавфсизлик ходими жойлаштирилган. Франция оммавий ахборот воситалари намойишларда 100 минггача одам иштирок этишини кутмоқда.

“Биз бутун мамлакат бўйлаб акцияларга олиб келадиган сафарбарликка дуч келиш хавфи остидамиз”, – деди Ретаё.

Унинг маълумотларига кўра, намойишларда тартибсизликни юзага келтирган 250 га яқин одам қўлга олинган.

Кеча тунда Парижда ҳам алоҳида акциялар ўтказилган, бироқ вазир тафсилотларни келтирмаган. У ерда 1000 га яқин намойишчи, уларнинг кўпчилиги ниқоб ёки балаклавада, Гар-дю-Нор темир йўл вокзалида полиция билан тўқнашган.

“Баъзилари вокзалга киришга уринган, бироқ полициячилар кўздан ёш оқизувчи газ қўллаб, уларни тўхтатган”, – деб хабар бермоқда Франция ОАВ.

9 сентябрь куни Франция президенти Эммануэл Макрон мамлакат мудофаа идорасини бошқарган Себастян Лекорняни янги бош вазир этиб тайинлаган.

• Fransiya
• Намойиш