“Дунёдаги энг хунук ит” интернет юлдузига айланди

Хитойда Huahua лақабли ит ўзининг ноодатий ташқи кўриниши сабаб ижтимоий тармоқларда машҳурликка эришди. Маҳаллий ОАВларга кўра, унинг иштирокидаги қисқа видеолар атиги бир ҳафта ичида миллионлаб томоша йиққан.

Фойдаланувчилар Ҳуаҳуани “хунук жозибадорлиги” учун мақтаб, уни ҳазил тариқасида “гўзаллик танловида охиридан биринчи ўринни олган ит” деб аташмоқда.

Маълум бўлишича, Ҳуаҳуанинг ота-онаси зотдор бордер-колли итлари бўлиб, уядаги бошқа кучуклар стандарт кўринишда туғилган. Huahua эса кам учрайдиган генетик мутация туфайли ўзгача қиёфага эга: унинг жуни тартибсиз ўсган, қулоқларида эса икки тутам патга ўхшаш узун жунлари бор.

Ностандарт кўриниши сабаб уни узоқ вақт сотишнинг имкони бўлмаган. Бироқ видеоси интернетда тарқалиб кетгач, Huahua қисқа фурсатда машҳур бўлди ва 3 август куни янги эгаси томонидан 2400 юань (тахминан 4,3 млн сўм) эвазига сотиб олинди.

Аввалроқ Кениядаги Масаи Мара миллий қўриқхонасида суратга олинган жингалак ёлли ноёб шернинг фотосурати ҳам интернетда миллионлаб фойдаланувчиларнинг эътиборини тортганди.