АҚШда Трамп хавфсизлигига таҳдид қилган шахс қўлга олинди

2 август куни АҚШ президенти Доналд Трампнинг ташрифи арафасида хавфсизлик ходимлари гольф майдони ҳудудида шубҳали ҳаракат қилган эркакни қўлга олди.

Полиция маълумотига кўра, эркак гольф майдони атрофида юриб, ҳудудни фото ва видеога олган ҳамда хавфсизлик чораларига оид тайёргарлик жараёнларини кузатган.

Аниқланишича, қўлга олинган шахс 38 ёшли Жанин Жон Теле бўлиб, у ҳибсга олинган пайтда бошқа жиноят — босқинчилик бўйича ҳам тергов остида бўлган.

Тинтув давомида ундан ўқ-дорилар, автомобилидан эса ўқланган тўппонча топилган. Шунингдек, уйидан қурол-яроғ, зирҳли нимча ва ҳуқуқ-тартибот идоралари томонидан “хавотирли баёнотлар” деб баҳоланган ёзувлар мавжуд дафтарлар мусодара қилинган.

Трампга аввалги суиқасд уринишлари

2026 йилда Доналд Трампга нисбатан бир неча бор суиқасд режалари фош этилган. Апрель ойида Washington Hilton меҳмонхонасидаги тадбир вақтида содир бўлган отишмадан сўнг гумонланувчи амалдорларга суиқасд тайёрлаганини тан олган.

Июнь ойида эса Федерал қидирув бюроси (ФБИ) Оқ уйда ўтказилиши режалаштирилган UFC тадбири вақтида амалга оширилиши мумкин бўлган суиқасднинг олди олинганини маълум қилган.

Бундан аввал, 2024 йил 13 июль куни Пенсилваниядаги сайловолди митингида Трамп қулоғидан яраланган, ҳужумчи эса Махфий хизмат ходимлари томонидан отиб ўлдирилган.

Шунингдек, 2024 йил 15 сентябрь куни Флорида штатидаги гольф клуби яқинида яна бир суиқасд уринишининг олди олинган. Ҳодиса жойидан АК-47 автомати, рюкзаклар ва GoPro камераси топилган, гумонланувчи Раян Раут эса суиқасдга тайёргарлик кўришда айбланган.