БМТ Бош Ассамблеяси Ўзбекистон Президенти ташаббуси асосидаги резолюцияни қабул қилди

БМТ Бош Ассамблеяси Ню-Ёрк шаҳрида бўлиб ўтган йиғилишда «Ижтимоий ривожланишни жадаллаштиришда парламентларнинг ролини кучайтириш тўғрисида»ги резолюцияни аъзо давлатларнинг мутлақ кўпчилик овози билан қабул қилди.

Мазкур ташаббус илк бор Ўзбекистон Президенти Шавкат Мирзиёев томонидан 2020 йил сентябрь ойида БМТ Бош Ассамблеясининг 75-сессиясидаги нутқида илгари сурилган эди. Кейинги йилларда Ўзбекистон дипломатиясининг саъй-ҳаракатлари натижасида ушбу ғоя халқаро ҳужжат шаклига келтирилди.

Резолюцияда Тошкент шаҳрида ўтказилган Парламентлараро Иттифоқнинг 150-Ассамблеяси ва унинг якунлари бўйича қабул қилинган Тошкент декларацияси эътироф этилган. Шунингдек, ҳужжатда парламентлар фаолиятида аёллар ва ёшлар иштирокини кенгайтириш, ривожланаётган мамлакатларни қўллаб-қувватлаш ҳамда ижтимоий соҳадаги халқаро ҳамкорликни мустаҳкамлаш масалаларига алоҳида эътибор қаратилган.

Резолюция учун ўтказилган овоз беришда 167 та давлат уни қўллаб-қувватлади. Ҳужжатнинг ҳаммуаллифлари қаторидан 61 та давлат ўрин олди. Улар орасида Австрия, Германия, Хитой, Япония, Жанубий Корея, Бразилия ва Испания каби мамлакатлар ҳам бор.

Расмийларга кўра, резолюциянинг қабул қилиниши Ўзбекистон томонидан илгари сурилган халқаро ташаббусларнинг БМТ доирасида қўллаб-қувватланаётгани ва мамлакатнинг халқаро ҳамкорликдаги фаоллигини намоён этади.