“Манчестер Сити” ва Ўзбекистон миллий терма жамоаси ҳимоячиси Абдуқодир Ҳусановнинг агенти Ғайрат Ҳасбиуллин футболчининг Европага йўли қандай бошланганини маълум қилди. Унинг сўзларига кўра, Франциянинг “Ланс” клуби Ҳусановни 2023 йили Аргентинада ўтган U-20 Жаҳон чемпионатида кашф этган.

Клуб скаути дастлаб бошқа футболчини кузатиш учун келган бўлса-да, Ўзбекистонга қарши ўйинда Ҳусановнинг ҳаракатлари эътиборини тортган. Иккинчи учрашувни ҳам томоша қилган скаут ҳисобот тайёрлаган ва бош мураббий футболчини жамоага олиб келишни сўраган. Ҳасбиуллиннинг айтишича, шундан сўнг “Ланс” билан музокаралар тез бошланган. Клуб раҳбарияти Ҳусановни жамоанинг асосий ҳимоячиларидан бири сифатида кўраётганини билдирган. Агент, шунингдек, Ҳусановнинг Беларусга йўл олиши ҳам тасодифий бўлмаганини таъкидлади.

У ерда ёш истеъдодларни ривожлантириш бўйича тажрибали мураббий Анатолий Юревич билан ишлаш футболчининг ўсишида муҳим роль ўйнаган. Ҳасбиуллиннинг маълум қилишича, Ҳусановга Россиянинг “Сочи” ва “Алания” клублари ҳам қизиқиш билдирган. Бироқ футболчининг асосий мақсади бошиданоқ Европа футболида тўп суриш бўлган. Эслатиб ўтамиз, Абдуқодир Ҳусанов 2025 йилнинг қишида Франциянинг “Ланс” клубидан 40 миллион евро эвазига Англиянинг “Манчестер Сити” жамоасига трансфер қилинган ва клуб билан 2029 йил ёзигача мўлжалланган шартнома имзолаган.