O‘zbekistonning Yekaterinburg shahridagi Bosh konsulxonasi og‘ir vaziyatga tushib qolgan yurtdoshlariga amaliy yordam ko‘rsatish hamda ularning huquq va qonuniy manfaatlarini himoya qilish ishlarini davom ettirmoqda.

Bosh konsulxonaga Navoiy viloyatida tug‘ilgan O.V.ning bir necha kundan buyon turarjoysiz qolgani va yashash uchun zarur sharoitlar yo‘qligi sababli ko‘chada tunashga majbur bo‘layotgani haqida xabar kelib tushgan.

Murojaat diplomatlar tomonidan zudlik bilan o‘rganilib, vatandosh bilan Bosh konsulxonada suhbat o‘tkazildi. Uning shaxsi va yuzaga kelgan holatlar aniqlangach, konsullik xodimlari fuqaroning yaqinlari bilan bog‘landi.

Shundan so‘ng vatandoshni doimiy yashash joyiga xavfsiz qaytarish choralari ko‘rildi. Bosh konsulxona ko‘magida Yekaterinburg–Toshkent yo‘nalishi bo‘yicha aviachipta xarid qilinib, fuqaroning O‘zbekistonga xavfsiz qaytishi ta’minlandi.