Испаниянинг шарқидаги Бунол шаҳрида анъанавий Ла Томатина фестивали бўлиб ўтди. Унда 20 мингдан ортиқ киши кўчаларда бир-бирига помидор отиб, ўзига хос «помидорлар жанги»да иштирок этди.

Фестивал давомида шаҳарнинг тор кўчаларига юк машиналарида жами 165 тонна помидор олиб келинди. Жанг тахминан бир соат давом этди.

Иштирокчиларнинг аксарияти оқ футболка кийгани сабабли тадбир якунига келиб, кийимлар қизил ва пушти рангга бўялди. Хавфсизликни таъминлаш мақсадида тадбир олдидан бинолар махсус ҳимоя қопламалари билан ёпилди ва кўчаларга политсия ходимлари жалб қилинди.

Ла Томатина ҳар йили август ойининг сўнгги чоршанбасида ўтказилади. Фестивал илк бор 1945 йилда маҳаллий аҳоли ўртасидаги озиқ-овқат жанжали сифатида бошланган. Кейинчалик у Испаниянинг энг машҳур ёзги тадбирларидан бирига айланган.

Сўнгги йилларда фестивал иштирокчиларининг қарийб 40 фоизини хорижий сайёҳлар ташкил этмоқда. Айниқса, 2011 йилда Испанияда суратга олинган «Зиндаги На Милеги Добара» филми намойиш этилганидан кейин Ҳиндистондан келувчи сайёҳлар сони сезиларли даражада ошган.

Фестивалнинг асосий қоидаларидан бири — помидорни бошқа иштирокчига отишдан олдин уни эзиш. Бу эҳтимолий жароҳатларнинг олдини олиш учун белгиланган. Айрим қатнашчилар кўз ва қулоқларини ҳимоя қилиш учун махсус кўзойнак ҳамда қулоқ тиқинларидан фойдаланади.

Бир соатдан сўнг тўп овози фестивал якунланганини билдиради. Шундан кейин иштирокчилар махсус жойларда ювиниб олади, шаҳар кўчалари эса сув ёрдамида тозаланади.