Ўзбекистонда ерости сувларига қудуқни қонунга хилоф равишда бурғилаш маъмурий жавобгарликка сабаб бўлиши белгиланди.

5 май куни имзоланган қонун билан айрим қонун ҳужжатларига ўзгартириш ва қўшимчалар киритилади. Ҳужжатда қайд этилишича, ерости сувларини ерларни суғориш ва бошқа мақсадлар учун олиш кескин ўсгани, шунингдек, қудуқларни рухсатсиз бурғилаш ва сувлардан назоратсиз, ҳисобга олмасдан фойдаланиш ҳоллари давом этаётгани сабабли ерости сув ресурсларини муҳофаза қилиш чораларини кучайтириш зарурати юзага келди.

Маъмурий жавобгарлик тўғрисидаги кодексга киритиладиган ўзгаришларга кўра, ерости сувли қатламларидан олинадиган сувдан фойдаланиш ва сув истеъмоли қоидаларини, ерости сувли қатламларидан сув олиш лимитларини бузиш, ерости сувларидан ўзбошимчалик билан сув олиш, ерости сувларига қудуқни қонунга хилоф равишда бурғилаш:

– фуқароларга БҲМнинг 6 бараваридан 15 бараваригача,

– мансабдор шахсларга эса 15 бараваридан 20 бараваригача миқдорда жарима солишга сабаб бўлади.

Бу ҳуқуқбузарлик маъмурий жазо чораси қўлланганидан кейин бир йил давомида такрор содир этилган бўлса, фуқароларга БҲМнинг 15 бараваридан 20 бараваригача, мансабдорларга БҲМнинг 21 бараваридан 30 бараваригача миқдорда жарима солишга сабаб бўлади.

Бундан жисмоний шахсларнинг ўз эҳтиёжлари, шу жумладан, томорқа ер участкаларини суғориш учун сувдан умумий фойдаланиши мустасно.

Солиқ кодексига киритилган қўшимчага кўра, ерости сув манбаларидан сув ўлчаш ускуналарисиз сув олинганда солиқ ставкаси белгиланган солиқ ставкаларининг 5 баравари миқдорида белгиланади. Бунда мазкур қоида жисмоний шахслар томонидан шахсий ва хўжалик эҳтиёжлари учун суткасига 5 метр кубгача бўлган ҳажмда ерости сувларини якка тартибда олиш ҳолларига нисбатан татбиқ этилмайди.

Бу ўзгариш қонун эълон қилинганидан 3 ой ўтгач амалга киритилади. Ушбу қонун қонунчилик палатаси томонидан 2025 йил 4 мартда қабул қилиниб, Сенат томонидан 30 апрель куни маъқулланган эди.

• “Туябўғиз” сув омбори
• Ўзбекистон
• Қарор
• Qoidabuzarlik