Эрон президенти Масъуд Пезешкиён мамлакат қўшни давлатларга ҳужум қилмасликка қарор қилинганини маълум қилди. Унинг айтишича, бу қарор кеча бўлиб ўтган раҳбариятнинг муваққат кенгаши йиғилишида қабул қилинган.

“Кеча раҳбариятнинг муваққат кенгашида шундай қарор қабул қилинди: энди қўшни давлатларга ҳужум қилинмайди ва ракета учирилмайди. Фақат ўша давлат ҳудудидан Эронга ҳужум қилинган тақдирдагина жавоб қайтарилади”, – деди у.

Пезешкиённинг таъкидлашича, Эрон ҳеч қандай шартларсиз таслим бўлиши ҳақидаги талаблар амалга ошмайди.

“Бизни шартсиз таслим бўлади деб ўйлаш – орзу холос”, – деди Эрон раҳбари.

Шу билан бирга, у қўшни давлатлардан узр сўраб, Эрон бошқа давлатларга қарши тажовуз қилиш ниятида эмаслигини таъкидлади.

“Биз бошқа мамлакатларга тажовуз қилиш ниятида эмасмиз. Барча келишмовчиликлар, хавотирлар ва ранжишларни четга суриб, биргаликда ҳаракат қилишимиз керак”, – деди у.

Пезешкиён, шунингдек, мамлакат ҳозирги вазиятда ўз ҳудудини ҳимоя қилишга мажбур эканини айтди.

“Бугун ўз юртимиз ҳудудини ҳимоя қилишимиз керак, шунда Эрон бу инқироздан боши баланд кўтарган ҳолда чиқади”, — деди у.

Эрон президенти мамлакат аҳолисига миннатдорлик билдириб, халқаро ҳуқуқ нормаларига риоя қилинмаётганини ҳам таъкидлади.

Унинг сўзларига кўра, “душманлар халқаро қонунларни инобатга олмасдан тиббиёт муассасалари, шифохоналар ва бошқа объектларга ҳам зарба бермоқда”.

• Баёнот
• Eron
• Президент