Калифорния университети (АҚШ) олимлари реал вақт режимида мия сигналларини нутққа айлантирувчи янги чип ишини намойиш этди. Мазкур чип эса Амеотрофик латерал склероз (ALS) билан касалланган 45 ёшли Кейси Ҳаррел нутқини тиклашга ёрдам берди. Бу ҳақда “Reuters” хабар берди.

Қайд этилишича, ушбу янги “мия-компьютер” интерфейси овозли ёрдамчи билан жиҳозланган бўлиб, беморнинг овозига аниқ тақлид қилади. Бунга Сунъий интеллект (СИ) томонидан касалликдан олдин ёзиб олинган аудио намуналарни ўрганиб чиқиш натижасида эришилган.

Биринчи синов натижалари шуни кўрсатдики, технология мия сигналларини 97 фоизгача тўғри танийди.

Бундан ташқари, дастлабки самарадорлик 99,6 фоизни ташкил этган. Бу кўрсаткич нейрочип сўз бойлигини 50 тадан 125 минггача оширгандан сўнг камайган. Аммо бу ҳали ҳам жуда яхши кўрсаткич, демоқда олимлар.

“Мия-компьютер” интерфейси ўтган ёзда Ҳаррел миясига имплантация қилинган эди. У 256 та микроэлектроддан иборат.

Эслатиб ўтамиз, бу ALS билан касалланган беморга мулоқот қилиш қобилиятини тиклашга ёрдам берган ягона мия чипи эмас. Ўтган йили, масалан, худди шундай тизим 36 ёшли немиснинг овозини тиклаган эди.

• Miya faoliyati