Forbes талқини бўйича энг юқори даромадли эркак спортчилар рейтинги эълон қилинди. Унга кўра, дунёдаги энг кўп маош оладиган спортчилар учлигига фақат футболчилар кирган.

Хусусан, португалиялик футболчи Криштиану Роналду Американинг Forbes журнали томонидан тузилган энг юқори даромадли спортчилар рўйхатида биринчи ўринни эгаллади. Унинг сўнгги 12 ойдаги умумий даромади 136 млн долларга баҳоланган.

Роналду бу маблағнинг атиги учдан бир қисмини – 46 миллион долларни футбол майдонида ишлаб топган. Португалиялик футболчи 2022 йил ноябрь ойида “Манчестер Юнайтед”ни тарк этиб, 2023 йилнинг январида Саудия Арабистонининг “Ал-Насср” клубига ўтган эди.

Яна 90 миллион доллар – Роналдунинг стадиондан ташқаридаги, шу жумладан рекламадан тушган даромади.

Рейтингнинг иккинчи поғонасидан ўтган йилги етакчи, 35 ёшли аргентиналик футболчи Лионел Месси жой олган. Унинг йиллик даромади ўзгармаган ҳолда 130 миллион долларни ташкил этган.

Бу қийматнинг ярмини Adidas, Budweiser, PepsiCo ва бошқа брендлар билан тузилган реклама шартномаларидан олган.

Яна бир футболчи, 24 ёшли франциялик Килиан Мбаппе дунёнинг энг кўп маош олувчи спортчилари учлигига кирган. У ўтган йили 120 миллион доллар ишлаб топган бўлса, шундан 100 миллион доллари футбол майдонидан келган.

Forbes талқинига кўра, дунёнинг энг кўп маош олувчи ТОП-10 спортчиси:

1. Криштиану Роналду (футболчи) – 136 млн доллар

2. Лионел Месси (футболчи) – 130 млн доллар

3. Килиан Мбаппе (футболчи) – 120 млн доллар

4. Леброн Жеймс (баскетболчи) – 119,5 млн доллар

5. Канело Алварез (боксчи) – 110 млн доллар

6. Дастин Жонсон (гольфчи) – 107 млн доллар

7. Фил Микелсон (гольфчи) – 106 млн доллар

8. Стефан Карри (баскетболчи) 100,4 млн доллар

9. Рожер Федеррер (теннисчи) 95,1 млн доллар

10. Кевин Дурант (баскетболчи) 89,1 млн доллар

Қайд этиш мумкин, рейтингни тузишда Forbes 2022 йилнинг 1 майидан 2023 йилнинг 1 майигача спортчиларнинг иш ҳақи ва бошқа барча даромадларини ҳисобга олган.

Шу тариқа, дунёнинг энг кўп маош олувчи ўн нафар спортчининг йиллик умумий даромади 1 миллиард доллардан ошган.

• Forbes
• Футбол
• Месси
• Роналду