Исроил 9 ойлик уруш давомида катта йўқотишларга учради. 2023 йилнинг октябрь ойидан декабригача деярли ярим миллион исроиллик яҳудий давлатини тарк этди.

Расмий маълумотларга кўра, 2023 йил 7 октябрда бошланган Ғазо можаросидан буён камида 683 нафар исроиллик аскар ҳалок бўлган ва 4100 дан ортиғи яраланган.

Шунингдек, Исроил ялпи ички маҳсулоти 2023 йилнинг октябрь ойидан декабригача деярли 20 фоизга қисқарди. Тахминан 46 000 Исроил корхонаси ёпилган. 2024 йил охиригача Исроилнинг яна 60 минг корхонаси ёпилиши кутилмоқда.

2023 йилнинг охирги чорагида Исроилдан товар ва хизматлар экспорти 18 фоизга қисқарди. Йил давомида экспорт 2,2 фоизга камайди.

Жорий йилнинг биринчи чорагида экспорт ҳажми ўтган чоракка нисбатан 5,5 фоизга, ўтган йилнинг шу даврига нисбатан эса 26 фоизга камайди. 2024 йил якунида Исроил бюджетининг тақчиллиги ЯИМнинг 6,6 фоизини, қарз эса ЯИМнинг 67 фоизини ташкил қилиши кутилмоқда.

Бундан ташқари, Исроилда туризм саноати ҳам тўхтаб қолди. Келган сайёҳлар сони 76 фоизга камайди. Исроилнинг урушдан олдинги энг гавжум порти бўлган Эйлат порти Яман ҳусийларининг Қизил денгиздаги ҳужумлари натижасида тижорат фаолияти йўқлиги сабабли банкрот деб эълон қилинди.

Иқтисодчилар Исроилда чуқур иқтисодий инқироз кузатилиши ҳақида огоҳлантиришмоқда ва баъзи халқаро кредит рейтинг компаниялари аллақачон мамлакат рейтингини ва иқтисодий ўсиш прогнозини пасайганини таъкидлашган.

• Фаластин
• Isroil
• Уруш