Бугунги кунда инсон саломатлигига таҳдид солувчи ташқи омиллар янада кўпайган. Масалан глобал иқлим ўзгариши бунга яққол мисол бўла олади. Жаҳон соғлиқни сақлаш ташкилоти раҳбарининг БМТ мутасаддилари билан навбатдаги қўшма баёноти айни шу муаммога бағишланди.
Унда қайд этилишича, сайёрамизда ҳаво ҳарорати кўтарилиши турли табиий офатлар билан бирга, хавфли инфекциялар ва касалликлардан ўлим кўрсаткичлари ортишига сабаб бўляпти. Қолаверса, очарчилик туфайли кўплаб инсонлар ҳаётдан кўз юммоқда.
ЖССТ бош директори Тедрос Гебрейесус бу ҳолатга баҳо берар экан, иқлим инқирозини саломатлик таназзулига қиёслади. Масалан, Африка мамлакатларида глобал исиш оқибатида юзага келган қурғоқчилик ва сув тошқинлари 47 миллион кишини очарчиликка дучор этган. Ичимлик суви танқислиги эса айрим минтақаларда вабо эпидемиясининг авж олишига туртки бўлган.
Бундан ташқари, Ер юзида ҳарорат кўтарилиши океанлар суви таркибида ишқорлар ортиши ва исишига олиб келди. Бу эса уммонлардаги озиқ-овқат учун яроқли жонзотларнинг қирилиб кетишига сабаб бўлмоқда.
Ўз навбатида, дунёда тахминан 222 миллион киши озиқ-овқат хавфсизлигининг юқори даражасидан азият чекяпти. Улар кунига атиги бир маҳал овқатланиш имконига эга. Шунингдек, 45 миллион одам очарчилик ёқасида қолмоқда.
“Буларнинг барчаси Ер куррасида ҳаво ҳарорати 1,2 даража ортгани асоратидир. Аммо вазият шундай давом этаверса, бу кўрсаткич яқин келажакда 2 баравар ошиши ҳеч гап эмас. Ўшанда инсоният глобал қурғоқчилик, тошқинлар ва янада хавфли эпидемиялар билан рўбарў келиши мумкин”, – дейди БМТ мутасаддиси.
Қўшма баёнотда келтирилишича, келаси ҳафта Мисрда бўлиб ўтадиган БМТнинг иқлим ўзгаришларига бағишланган конференциясида ушбу мавзу кун тартибидаги асосий масала бўлади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!