Туркманистон Халқ маслаҳати раиси Гурбангули Бердимуҳамедов Туркий Давлатлар Ташкилотининг Анқарада бўлиб ўтган навбатдан ташқари саммитида Туркия Республикаси Президенти Ражаб Тоййиб Эрдоған номзодини Тинчлик учун Нобель мукофотига кўрсатишни таклиф қилди. Бу ҳақда у бугун, 16 март куни сўз очди.

У Ражаб Тоййиб Эрдоған билан дўстлиги 22 йиллик тарихга бориб тақалишига алоҳида урғу берди.

“Қадрли дўстим Ражаб Тоййиб Эрдоған! Биз сиз билан 22 йилдан буён танишмиз. Бу йиллар ичида Туркманистонга кўрсатган ёрдамингиз учун туркман халқи номидан самимий миннатдорлик билдираман”, дейди Бердимуҳамедов.

Бердимуҳамедов Эрдоған дунёда муҳим сиёсий шахсият эканини айтиб, уни Тинчлик учун Нобель мукофотини олишга лойиқ раҳбар эканини билдирди.

“У нафақат ўз халқи, балки бутун мусулмон халқларининг тинч-тотув яшаши учун катта саъй-ҳаракатларни амалга оширмоқда. Эрдoған минтақада ва дунёда тинчлик ва хавфсизлик, барқарор ривожланиш ва халқаро муносабатларда ўзаро тушунишни таъминлаш борасида улкан ишларни амалга оширмоқда. Буларни инобатга олган ҳолда Туркия Президенти Ражаб Тоййиб Эрдоғанни Тинчлик учун Нобель мукофотига номзод қилиб кўрсатамиз ва бу йўналишдаги барча таклифларни қўллаб-қувватлаймиз. Эрдоған ҳақиқатан ҳам ушбу халқаро мукофотга лойиқ бошқарувчи”, дейди Туркманистоннинг собиқ Президенти.

Шунингдек, Гурбангули Бердимуҳамедов Туркманистон тез орада Туркий Давлатлар Ташкилотига тўлақонли аъзо бўлишини айтиб, ташкилотга аъзо ва кузатувчи давлатлар раҳбарларини Ашхободга таклиф қилган.

“Агар қонунчилигимиз такомиллаштирилса, Туркманистон туркий оила қаторига қўшилиши мумкинлигига ишонаман”, – дейди собиқ президент.

Бердимуҳамедов, шунингдек, Марв шаҳрини 2024 йилда туркий дунёнинг маданий пойтахти деб эълон қилишни ҳам таклиф этган. У февраль ойидаги зилзилалар ҳақида гапирар экан, турк дунёси бирлиги муҳимлигини қайд этган.

• Эрдоған
• Гурбангули Бердимуҳамедов
• Туркия
• Туркманистон